Azeem Amrohvi

dil se dha.Dakan Khuun se azm-e-safar le jaayegaa

Poet: Azeem Amrohvi

dil se dha.Dakan Khuun se azm-e-safar le jaayegaa

dil se dha.Dakan Khuun se azm-e-safar le jaayegaa
vaqt ik din chiin kar saare hunar le jaayegaa

[azm-e-safar =strength to travel; hunar = knowledgeskills]

haa.N duaa maa.Ngii thii lekin ye to sochaa bhii na thaa
mausam-e-barasaat sab diivaar-o-dar le jaayegaa

aaj is titalii ko in phuulo.n pe u.Dane diijiye
kal ko_ii jho.nkaa havaa kaa is ke par le jaayegaa

[titalii = butterfly; par = wing]

tuu kisii andhe kuye.N me.n jaaye to ye jaan le
saath saath apane ye merii bhii nazar le jaayegaa

[ku_aa.N = well; nazar = sight]

duusaro.n ke ghar me.n patthar phe.nkane vaale ye soch
tuu bachaa kar kis tarah shiishe kaa ghar le jaayegaa

shahar kii sa.Dako.n pe mere saath mat nikalo abhii
jo bhii dekhegaa u.Daa kar ye Khabar le jaayegaa

sar-bulandii jis kaa manasab hai vo jhuk sakataa nahii.n
dast-e-qaatil us kaa Khud neze pe sar le jaayegaa